فبراير 13, 2017

١٠ خطوات لنجاح مشروعك

لو بتفكر تبدأ مشروع جديد بس مش عارف تبدأ منين، إحنا جمعنالك هنا ١٠خطوات بسيطة هتضمنلك وصول فكرتك لأول الطريق الصح والنجاح اللي بتحلم بيه.

خلي عندك الحماس
معظم المشروعات الجديدة الناجحة بتكون بتعكس حماس اصحابها، بتنجح أكتر من المشاريع اللي بدأت كضرورة أو المشاريع اللي اصحابها بيكونوا شايفنها طريقة سهلة يكسبوا منها فلوس. دايما خليك واثق في فكرتك ومتحمس لكل تفاصيلها.
جاك ما، مؤسس موقع Alibaba الصيني لما فكر يعمل الموقع كل الناس هاجمته وقالوا ازاي عايز تعمل موقع ينافس amazon و Ebay، بس عشان كان عنده الحماس المطلوب، النهاردة موقع Alibaba عليه أكتر من 423 مليون مستخدم ومشتري.
بسَط فكرتك
ابدأ بحل مشكلة واحدة بفكرة واحدة لعميل واحد، الافكار الكبيرة اللي اتحولت لمشروعات ضخمة مبدأتش بأفكار معقدة بالعكس بدؤا بافكار في منتهى البساطة اسئل نفسك اسئلة مهمة:

  • إزاي المنتج أو الخدمة اللي بتقدمها هتفرق في حياة الناس؟
  • هل العملاء محتاجين للمنتج أو الخدمة اللي بتقدمها؟
  • هل العملاء هيشتروا المنتج أو الخدمة بشكل متكرر؟ وهل هتكون مربحة بالنسبة ليك؟
مصدر واحد للايرادات

في البداية، يعني ايه مصدر الايرادات؟ هو المقابل اللي بتحصل علية من بيع منتجاتك وخدماتك ، يعني الفلوس.
متشغلش نفسك كتير وانت لسه بتبتدي بتنوع مصادر الايرادات، ركز على مصدر واحد عشان يبقى اقوي ويكبر ويستمر ويدعم مشروعك.

أصبر 

“عمر النجاح ما بيتحقق بين يوم وليلة” دايما افتكر المقولة دي، خلي عندك قوة ارادة حتى لو فشلت وأقف تاني، طبعا ده صعب .. هيعدي عليك أيام صعبة كتير هتحس فيها انك مش قادر تكمل .. اوعي تستسلم للاحساس ده وافتكر دايما ايه اللي خلاك تبدأ.
ونصيحة تانية مهمة جدا، مش نهاية المطاف لو العملاء أو المستثمرين رفضوا فكرتك، بالعكس، شوف ايه اللي مش عاجبهم وعدله وحاول تاني وأصبر.

إعرف عميلك

يعتبر أكبر غلط انك تحاول ترضي كل الناس، فكر في عملائك بشكل محدد واعرف كل حاجة عنهم مش بس بيحبوا ايه بيكرهوا ايه، سنهم، أنت اكيد عارف كل ده، احنا نقصد كل تفصيله عنهم
ازاي بيقضوا اوقاتهم، منتجاتك بتناسب احتياجاتهم اليومية، بيقضوا اجازة اخر الاسبوع فين؟ بيعملوا انشطة معينة  ولا لأ؟  ومنتجاتك هتناسبهم في الاوقات دي ولا لأ؟
وكلما التفاصيل زدات كلما عرفت توصلهم أسرع و أسهل، أوصل لإحتياجاتهم بالتحديد وبيع.

حدد التكاليف

دور وابحث وحدد التكاليف الاساسية لتشغيل مشروعك والارباح المتوقعة وده هيساعدك بشكل كبير مش بس في ادارة مشروعك بكفاءة ده كمان هيساعد المستثمرين على فهم فكرتك وإمكانية تنفيذها.

خليك أصلي

تعامل بمنتهى الجدية مع فكرتك وإسأل نفسك، هل هي فكرة جديدة؟ هل العلامة التجارية هتثبت نفسها في السوق قصاد علامات تجارية كتيرة سبقتك؟ انت داخل علي منافسة ولازم تكون مستعد لتقديم منتج/خدمة جديدة للسوق ولو الخدمة/المنتج موجود فلازم تقدمها بشكل مختلف.

اقتحم مواقع التواصل الاجتماعي

أول ما تنزل السوق لازم تسوق كتير للمنتج / الخدمة اللي بتقدمها. انشر على قد ما تقدر علشان تقدر توصل للناس، ومفيش وسيلة أسهل من الانترنت ممكن تحققلك الهدف ده.
ابدأ باختيار واحد من مواقع التواصل الاجتماعي ويكون مناسب لطبيعة مشروعك وبالتالي يحققلك النتايج المطلوبة ولازم تكون صفحتك/حسابك على دايما متجدد وواضحة واهم من كل ده انها تكون وسيلة للتفاعل مع متابعينكو معجبينك.
لازم يكون عندك موقع الكتروني العملاء يقدروا يدخلوا عليه بسهولة ويعرفوا منه كل المعلومات الممكنة عن مشروعك. ويكون سهل استخدامه من خلال الموبايل 90% من زيارات الموقع بتتم من خلال الموبايل.

متخافش من المنافسة

متخافش من وجود منافسين ليك في السوق، وافتكر أن وجودهم معناه ان في سوق كويس لمنتجاتك، وخلي المعلومة دي دايما مصدر الهام ليك عشان تتخطى منافسينك عن طريق سد أي فجوه في السوق واي فراغ هما سايبينه.

اختار موظفينك صح
اهم حاجة في مشروعك هو اختيارك للناس اللي هتشتغل فيه. يعني لما تعين ناس لازم تختار بدقة الناس اللي هتشاركك النجاح واللي هتعمل فرق كبير في مشروعك ودي مش خطوة سهلة.
تابع معانا الخطوات دي:

  1. اختار الشخص المناسب لكل وظيفة.
  2. اختار الشخص اللي عرف هو عايز يكون ايه في مستقبل المهني.
  3. ختبر امكانياته التحليلية وقدرته على التعلم.
    سايمن سينك قال لو هتعين الناس علشان بس يعملوا الشغل، هيعملوا المطلوب بس علشان الفلوس بس لو عينت ناس مؤمنة باللي انت مؤمن بيه هيشيتغلوا بكل نقطة في دمهم.

الخطوات العشرة دول هما الخطوات الاساسية علشان توصل لطريق النجاح، واحنا هنا بنستثمر وقتنا عشان نضمن معرفتك بافضل الخبرات والتجارب من خلال مجموعة كبيرة من المنتجات والخدمات البنكية.
مستني ايه أضغط هنا علشان تعرف اكتر.
ومتنسوش بنك الإسكندربة بيقف جنب المشروعات الجديدة، وخصوصا الصغيرة والمتوسطة منها

 

 

Leave a Comment

You must be logged in to post a comment.