فبراير 12, 2017

١٠ خطوات هتعرفك إزاي ترفع أسعارك من غير ما تخسر العميل

رواد الأعمال وكمان العملاء متوقعين زيادة الأسعار، فمش لازم تقلق أوي في الوقت اللي بترفع فيه أسعارك، لو أنت مثلًا في سوق تنافسي هتحتاج تشتغل أكتر شوية علشان تحافظ على وضعك منتجك في السوق، لكن طالما أنت بتقدم قيمة عالية؛ فرفع أسعارك ممكن يخليك تكسب عملاء زيادة لو رفعت السعر بشكل صحيح.

 

شوف معانا الخطوات الجاية، اللي جربها مجموعة كبيرة من رجال الأعمال الناجحين عن إزاي تقدر ترفع أسعارك من غير ما تخسر عملائك.

 

1- استهدف شريحة مختلفة من المستهلكين

لو أنت محتاج تزود أسعارك، يبقى لازم تعيد ضبط الخطة التسويقية بتاعتك علشان  تستهدف شريحة مختلفة من العملاء تقدر تدفع تمن السلعة بتاعتك، وده عن طريق إنك تغير مكانك، أو تستخدم وسائل تسويق جديدة، بالطريقة دي تقدر توصل لعملاء أكتر، وتعمل بيزنس بميزانية أكبر.

 

2- الوقت هو كل حاجة

تحديد الوقت اللي ترفع فيه سعرك ده قرار مصيري، لازم لما تقرر ترفع أسعارك تكون بقالك فترة في السوق، بنيت من خلالها سمعة كويسة لمنتجك، وده اللي هيشجع العملاء على تقبل زيادة أسعارك.

 

3- وضح ديمًا

المصدقية ديمًا هي أفضل وسيلة، اشرح ديمًا لعملائك السبب اللي خلاك ترفع أسعارك، زي مثلًا إنك دلوقت بتستخدم ديليفري أسرع أو خدمة أسرع، أو فترة ضمان وصيانة أطول.

مافيش حد عاوز يدفع زيادة على خدمة ما، في الوقت نفسه اللي الكل عاوز خدمة كويسة ليها قيمة عالية، فلازم توريهم إنهم هيستفيدوا أكتر من زيادة السعر، وقتها هيتفهموا سبب الزيادة.

 

 

4- الخصومات على مجموعة منتجات ديمًا بتكسب

خطوة ذكية وبسيطة وفعالة وهي إنك تربط خدمة رخيصة أو صغيرة أو عادية من قائمة منتجاتك أو خدماتك على سبيل “الهدية” إلى جانب المنتج اللي بتبيعه.

على سبيل المثال: ممكن تقدم خدمة لف هدية، كارت شخصي، ضمان ممدود، الخدمات دي مش مربوطة بالمنتج نفسه، بس بتضيف قيمة للعملية الشرائية.

 

 

5- خلي في اختيار لسعر أرخص

خلينا نواجه الأمر.. مع تأثير القوة الشرائية للأفراد جزء كبير من العملاء مش هيقدروا يتحملوا سعر مجموعة المنتجات مع بعض. لكن.. ممكن يناسبهم عرض أصغر من العرض العادي لتخفيض السعر.

 

مثال: لو أنت بتبيع عرض 10 أقلام بسعر 10 جنيه،  وأنت محتاج تعلي السعر لـ 15 جنيه، ليه ماتعملش عرض 5 أقلام  بسعر 8 جنيه؟

الناس ممكن يغيروا استخدماتهم، يتأقلموا بشكل ما.. لكن مش ممكن يخلقوا فلوس لو هي مش معاهم.

 

6- قدم للعميل 110% خدمة

إنك تقدم حاجة زيادة مش معناه إنك تتكلف كتير في إنك تدي خدمة زيادة بسيطة لعملائك.

طريقة بسيطة: لو أنت مستني عربيتك تخلص الصيانة بتاعتها، ولقيت في مكان الصيانة مشروبات أو تليفزيون، شوية كتب وكنبة، أو حتى واي فاي، ده هيخلي  الـ 4 ساعات اللي هتستنى فيهم عربيتك تخلص مريحين.

الناس بيحبوا الاهتمام،  لو كان منتجك في نفس المستوى، ممكن تحسن الخدمة عن طريق إنك تاخد بالك من احتياجات العميل خلال وقتك معاهم.

 

7- خطط لقدام

مهما كانت مفاجأة معظم حالات  رفع الأسعار ممكن نحس بيها أو نتوقعها. دور  ديمًا في إمكانية رفع أسعارك في السنة الجاية أو الشهر الجاي، وقتها هتقدر تحط خطة وفقًا لكده.

 

 

8- وضح بس ماتعتذرش

خوفك من فقدان العميل أو خسارته لا يعني  إنك بتعمل حاجة غلط. والأسوأ من كده إن نبرة الاعتذار اللي ممكن يحسها العميل في تعاملك معاه بعد زيادة أسعارك ممكن تدي انطباع إنك بتعمل حاجة غلط وبتحاول تخفيها. كمل بطريقة عادية، الناس اللي فعلًا بتقدر خدماتك هتتفهم مجهوداتك في إنك تحافظ عليهم.

 

9- بلغ عملائك قبل ما ترفع الأسعار

“لو كنت أعرف بس! كنت اشتريت 10 بدل 2”..  جملة مألوفة صح؟

إنك تقول لعملائك إن في ارتفاع في الأسعار هيحصل -لو تقدر- هيساعدهم إنهم يرتبوا خطتهم، المعلومة دي هتكون مفيدة، وممكن كمان ترفع مبيعاتك بشكل مؤقت، وهتخلي عملائك راضيين بالفرصة اللي إدتهالهم في إنهم يشتروا قبل ما الاسعار ترتفع، وهيشكروك على كده.

 

10- خليك متوقع رد فعل عنيف

خلينا نواجه الأمر، أنت مش هتقدر ترضي كل الناس، سواء كان في الواقع أو على وسائل التواصل الاجتماعي، هتقابل ديمًا عملاء غير راضيين، بيعبروا عن غضبهم، لما ده يحصل ديمًا حاول تمتص غضبهم، بينلهم تفهمك لنرفزتهم، وضحلهم على قد ما تقدر نقطتك، بس -مرة كمان- ماتعتذرش.

 

تغيير الأسعار لعبة بين السوق والعميل، ادرس ديمًا سوق منتجك أو خدمتك بحرص شديد، واختار ديمًا الخطة المناسبة ليك، وقتها هتقدر تكون من الناجين من موجة الأسعار دي.

Leave a Comment

You must be logged in to post a comment.