فبراير 12, 2017

٥ خطوات بتفصل بينك وبين فريق أحلامك

تجميع فريق العمل المناسب” من أهم صفات البزنس مان الناجح، زي مثلًا “فيسبوك” و”آبل”.

إنك تدور على الموهبة، والقدرة اللي جوه الأشخاص، وإقناعهم إنهم ينضموا ليك مهارة بتقلب كل الموازين في مجال الأعمال، لإن لو صورة وسمعة الشركة من صاحبها، فنموها وقدرتها على البقاء بتعتمد على كفاءة فريقها.

 

تعالوا نشوف أهم النصائح لتوظيف فريق أحلامك

1- الالتزام والولاء

الشركات بتستثمر وقت وموارد كتير في كل موظف عندها، عشان كدة لازم تتأكد إن إستثمارك ده هيكون طويل المدي. تقدر تعرف أكتر عن مدى التزام وجدية المتقدم بناء على تاريخه في الوظايف اللي قبل كدة: المدة اللي قضاها والأسباب اللي مش عشانها. ومن العلامات اللي بتدل على الإلتزام كمان هو الأنشطة التطوعية اللي المتقدم بيعملها، أو ورش العمل اللي بيحضرها عشان يطور من نفسه.

 

2- مهارات التعلم والتحليل

دايمًا اختبر قدرة المتقدمين على التحليل والملاحظة والتعلم، وبالذات تعلم الأشياء الجديدة عليهم، وكمان حرصهم على تطوير مهاراتهم. وممكن في كل إنترفيو تعمل إختبار بسيط للمتقدمين يساعدك تختبر مهارات التعلم عندهم وقدرتهم على التفكير وحل المشكلات.

 

3- التكافؤ والتأقلم

من المهم إن شخصية وطباع الموظف تكون منسجمة مع بيئة الشركة وثقافته، اختبر مهارات المتقدم الاجتماعية في التكيف والتعامل مع الآخرين، خاصة الموظفين والمديرين الحاليين. اسأل المتقدم عن طريقة إدارته لعلاقاته مع عملاء شركته السابقة، ولو شركتك الموظفين بتوعها من خلفيات وثقافات مختلفة، اتأكد إن المتقدم عقليته متفتحة كفاية إنه يتقبل الآخرين.

 

4-في الإنترفيو، اسأل الأسئلة الصح

الإنترفيو وسيلة قوية جداً في مرحلة التعيين، لو إستخدمتها صح وسألت الأسئلة المناسبة هتقدر بسهولة تميز المرشح الشاطر من المرشح المتوسط. عندك مثلاً سؤالين هيساعدوك تختبر قدرة المرشح على الإدارة:

السؤال الأول: عمرك كنت جزء من فريق ناجح؟ لو الإجابة “آه” يا ريت تشرحلنا دورك في نجاح الفريق ده.
السؤال التاني: كمدير أو مشرف جزء من شغلك هو إنك تقود وتوجه الفريق اللي انت مسئول عنه، إشرحلنا إزاي نجحت إنك تحقق ده قبل كدة.

 

 

5- الطموح والشغف

ممكن تكون كلمات تقليدية بنسمعها في كل إنترفيو، بس الحقيقة إن الطموح والشغف عوامل أساسية في اختيار الفريق. لما الموظف بيكون عنده شغف بمجال شغله، ده بيخليه دايمًا بيقرا ويعرف عنه أكتر، وهتلاحظ دايمًا الفرق بين شغل الشخص الشغوف والشخص العادي. لأن الأول بيقدملك أكتر من اللي بتطلبه في الشغل، لكن التاني بيأدي الشغل المطلوب منه بالظبط بدون مجهود زيادة.

والشخص الطموح هتلاقي دايمًا عنده روح المنافسة اللي بتخليه عايز يحسن من أدائه طول الوقت. وده نوع الموظفين اللي تقدر تعتمد عليه في مشروع مهم لأنه هيتعامل مع الوظيفة المطلوبة منه كأنها عمله الشخصي، و هيخليها أولوية عنده.

 

الموظفين اللي بيمتلكوا الطموح والشغف دايمًا أقدر على تحقيق نجاح ملحوظ في أقل وقت، والنجاح ده هينعكس طبعًا على شركتك.

 

في النهاية ماتقللش أبدًا من أهمية اختيار الفريق المناسب، وأثره على العمل.. وحاول ديمًا تقليل عدد “الموظفين”، وتزود عدد “أفراد الفريق” اللي بيبقوا عايزين فعلًا النمو والتطور للشركة، وبيحبوا يضيفوا قيمة حقيقية ليها، وبيؤمنوا بقيمها. 

Leave a Comment

You must be logged in to post a comment.